Ngjarje

“Në gjurmët e Nënë Terezës në Kalkutë” 

 

Viti 2010, në përkujtim të 100-vjetorit të lindjes, është shpallur Viti i Nënë Terezës. Në këtë kuadër paraditen e datës 9 dhjetor u hap në mjediset e Bibliotekës Kombëtare ekspozita fotografike e titulluar “Në gjurmët e Nënë Terezës në Kalkutë”. Fotot e ekspozuara janë riprodhuar nga albumi fotografik “Il Bene dimenticato” (Bukuria e harruar) e autoreve italiane Elisa Venturelli dhe Federica Miglio, të cilat projektuan për të pranishmit edhe foto të zgjedhura nga hulumtimi i tyre në Kalkutë në gjurmët e Nënë Terezës dhe Motrave të saj. Veprimtaria organizohet nën bashkëpunimin e Institutit Italian të Kulturës dhe të Bibliotekës Kombëtare.

Në fjalën e hapjes z. Aurel Plasari, drejtor i Bibliotekës Kombëtare, falënderoi të pranishmit në ceremoni: znj. Flavia Tibaldi , drejtore e Institutit Italian të Kulturës; znj. Zana Turku, zv/ministre të Turizmit, Kulturës, Rinisë dhe Sporteve; zonjat autore të albumit; z. Maks Velo, të cilin ai e quajti “eminencë të kulturës shqiptare”; prof. Neritan Cekën, këshilltar i Kryeministrit; anëtarët e këshillit shkencor, kolegët dhe specialistët e BK.

Znj. Flavia Tibaldi falënderoi z. Plasari për bashkëpunimin në organizimin e kësaj veprimtarie në nderim të Nënë Terezës, figurë, siç tha ajo, me përmasa botërore, por me një vlerë të veçantë për Shqipërinë.

Duke përshëndetur në emër të Ministrisë së Turizmit, Kulturës, Rinisë dhe Sporteve znj. Zana Turku përgëzoi organizimin e kësaj ekspozite për Nënë Terezën, të cilës, tha ajo, i kemi shumë borxhe (ose: i detyrohemi aq shumë).

Studiuesi Maks Velo vlerësoi albumin fotografik dhe aftësinë artistike të fotografeve. Janë foto që të mbeten në mendje, theksoi ai, foto në të cilat Nënë Tereza rrezaton me thjeshtësinë e vet. Filozofia e saj, u shpreh z. Velo, është e vetmja filozofi ballkanike pozitive që i japim botës.

Në fund të ceremonisë, duke rimarrë fjalën, z. Plasari sugjeroi që albumi të botohet edhe në gjuhën shqipe, ndryshe nga “tirazhi i kufizuar” italian, me një tirazh të lartë si një botim që çdo familje shqiptare duhet ta ketë në bibliotekën e vet.