Ngjarje

Mbyllen me sukses veprimtaritë për 90-vjetorin e Bibliotekës Kombëtare 

 

Mbrëmjen e 24 janarit të vitit në vijim Biblioteka Kombëtare mbylli veprimtaritë e programuara me rastin e 90-vjetorit të krijimit të saj. Në një prej mjediseve kryesore të bibliotekës u organizua promovimi i dy botimeve të saj “Libri Shqip 1555-1912 në fondet e Bibliotekës Kombëtare” dhe “Bibliografi e Librit Shqip në fondet e Bibliotekës Kombëtare (1913-1944)”. Morën pjesë në këtë veprimtari Kryeministri Sali Berisha, anëtarë të qeverisë, deputetë, diplomatë të ambasadave të akredituara në Tiranë, studiues, shkrimtarë, gazetarë, lexues dhe punonjës të institucionit.

Në përshëndetjen e tij, kryeministri Berisha u shpreh:

“Së pari dëshiroj tu përshëndes shumë përzemërsisht ju, punonjësve të kësaj biblioteke , për të gjithë punën e shkëlqyer që keni bërë dhe bëni në shërbim të dijes, në shërbim të librit, punë e cila me vizionin e zotit Plasari ka njohur zhvillime shumë të rëndësishme, ka ndjekur kohën me vendosmëri të madhe.

Sot, ju rezultat i këtij përkushtimi të plotë ndaj librit dhe dijes i jepni botës së mendimit shqiptar, një enciklopedi të gjenisë së tij krijuese nga viti 1555 deri në vitin 1944, pra keni arritur të paraqisni një dokument fondamental themelor, në shërbim të të gjithë studiuesve, një dokument burimor, për gjininë krijuese shqiptare në shekuj.

Biblioteka Kombëtare në kushte qartësisht të vështira është përpjekur dhe ka arritur të shënojë transformime te mëdha, biblioteka ka ecur me ritmet e kohës, me mundësi dhe mjete modeste, por ka bërë çdo gjë, me energjinë, dashurinë për punën, përkushtimin e punonjësve të saj, vizionin drejtuesve të saj, të përshtatet me ritmet e kohës.

Unë dua tu garantoj ju, se qeveria vlerëson bibliotekën si një institut themelor të zhvillimit të dijeve në të gjitha fushat dhe është e vendosur tu mbështesë ju, në të gjitha përpjekjet për një modernizim tërësor për realizimin e projekteve më bashkëkohore, në mënyrë që lexuesit shqiptarë, studiuesit shqiptarë, por edhe të gjithë ata që lexojnë për botën shqiptare, për gjeninë krijuese shqiptare të kenë lehtësirat më të mëdha në gjetjen dhe mundësinë e përdorimit të burimeve të pafundme të kësaj gjenie krijuese.

Sikundër, ju garantoj se në rast se qeveria vendosi të festojë 100 vjetorin e themelimit të pavarësisë ne dy projekte, me projektin e parlamentit dhe të stadiumit, kjo në asnjë rrethanë, jo se ju nuk meritoni atë seli, atë ndërtesë, të cilët ne jemi absolutisht të vendosur ta përparsojmë sa më shpejt që të jetë e mundur dhe ti japim vendit një bibliotekë të re të denjë për Shqipërinë , për ju, për të gjithë studiuesit.

Zoti drejtor unë dua tu falënderoj ju, për përkushtimin e madh, për vizionin që ke dëshmuar në rritjen e rolit, në përshtatjen e rolit , në zhvillimin do të thosha të këtij institucioni që është një nga shtyllat më kryesore të fondit të kulturës dhe identitetit tonë kombëtar.

Ndaj dhe njëherë dua që tu përgëzoj për mënyrën dinjitozë që keni përzgjedhur për të nderuar 90 vjetorin e krijimit të bibliotekës. Shpreh bindjen se në 100 vjetorin e pavarësisë së vendit, biblioteka do të shënojë arritje të tjera të mëdha.”

Pasi u uroi mirëseardhjen të pranishmëve, drejtori i Bibliotekës Kombëtare z. Aurel Plasari tha se veprimtaritë për 90-vjetorin e kësaj qendre të rëndësishme të kulturës kombëtare mbyllen me një kulmim të stafit të saj: promovimin e këtyre dy bibliografive, vepra themelore që i kanë munguar kulturës sonë. Ai falënderoi autorët dhe brezat e bibliografëve për kontributin e dhënë.

Duke folur për rëndësinë e botimit të këtyre dy bibliografive, znj. Nevila Nika, drejtore e përgjithshme e Arkivave të Shtetit, tha se është emocionuar nga leximi i tyre, madje i quajti “një mrekulli”. Ajo konsideroi që këto dy libra duhet të jenë në bibliotekat personale të secilit prej nesh. “Deri dje,- vijoi znj. Nika,- sa herë që flitej për bibliografinë shqiptare kemi përmendur të huajt si Legrandin me shokë, ndërsa tani kemi këto dy vepra të hartuara nga specialistët e Bibliotekës Kombëtare”.

Me vlerësimet më të larta për këto botime foli edhe z. Sali Bashota, drejtor i Bibliotekës Kombëtare dhe Universitare të Kosovës. Ai e quajti pasuri kulturore kombëtare hartimin e këtyre dy bibliografive. Z. Bashota vuri në dukje vlerën e tyre si dëshmi e informacionit bibliografik të organizuar, kriteret e sakta të hartimit, vlerën shkencore etj. Ai i quajti këto dy botime “histori të kulturës shqiptare”, që do të lexohen si një kryevepër e saj që vjen në kohën e duhur për studiuesit dhe lexuesit, si shprehje e trashëgimisë kulturore dhe si një enciklopedi e llojit të vet.

Në këtë veprimtari foli edhe z. Sali Berisha, i cili uroi përzemërsisht punonjësit e Bibliotekës Kombëtare për punën e shkëlqyer në shërbim të dijes, punë që nën vizionin e z. Plasari ka njohur zhvillime të rëndësishme dhe ka ndjekur ritmet e kohës. “Sot,- vijoi ai-, ju i jepni botës intelektuale një enciklopedi të mendimit shqiptar sepse keni arritur të paraqisni një dokument themelor të burimeve të gjenisë krijuese shqiptare”. Kryeministri vuri në dukje se Biblioteka Kombëtare, në kushte qartësisht të vështira, është përpjekur dhe ka arritur përparime të mëdha me mundësi dhe mjete modeste, por me energji dhe përkushtim të stafit dhe të drejtorit Plasari.

Në këtë ceremoni iu dha medalioni i 90-vjetorit të Bibliotekës Kombëtare kryeministrit Sali Berisha, ministrit të Turizmit, Kulturës, Rinisë dhe Sporteve Ferdinand Xhaferaj, Drejtorit të Bibliotekës Kombëtare dhe Universitare të Kosovës Sali Bashota, drejtores së Institutit Italian të Kulturës në Tiranë Flavia Tibaldi, kryespecialistes së Bibliotekës Kombëtare, tashmë e pensionuar, Farfuri Xhaja, drejtorit të botimeve “Onufri” Bujar Hudhri dhe studiuesit Sherif Delvina, njëri ndër anëtarët më të vjetër të Këshillit Shkencor të BKSh.

Pjesë e veprimtarisë ishte edhe ekspozita e librit titulluar “Naim Frashëri-një aventurë editoriale”, në të cilën janë paraqitur në rend kronologjik botimet e rilindasit të madh në periudhën 1882-1912 me vend botimi Stamboll, Bukuresht, Sofje, Selanik dhe, më në fund, Korçë.