Ngjarje

Mbledhje përkujtimore e 91-vjetorit të shpalljes së Tiranës kryeqytet 

 

Më datë 11.02.2011, ora 10:00, shoqata «Tirana» në bashkëpunim me Bibliotekën Kombëtare organizuan një takim përkujtimor me rastin e 91-vjetorit të shpalljes së Tiranës kryeqytet.

11 shkurti 1920 njihet në histori si dita kur në qytetin e Tiranës u vendos qeveria e dalë nga Kongresi i Lushnjës, qeveri që hodhi bazat e shtetit modern shqiptar. Që nga ajo kohë, Tirana qe dhe mbeti qendra politike, kulturore dhe administrative e Shqipërisë, si dhe kryeqytet i vendit.

Takimi u zhvillua në mjediset e rinovuara të ndërtesës së vjetër të Bibliotekës Kombëtare, në sallën «Lumo Skëndo». Ngrehina ku është vendosur kjo bibliotekë u ngrit rreth 80 vjet më parë mbi themelet e selisë së Qeverisë së Parë të dalë nga Kongresi i Lushnjës. Selia ka shërbyer më parë si ndërtesë e nënprefekturës së Tiranës ku, më 26 nëntor 1912 u ngrit flamuri i Pavarësisë dhe sheshi përreth saj mban emrin “Sheshi i Flamurit”.

Në fjalën e tij, drejtori i Bibliotekës Kombëtare z. Aurel Plasari theksoi kënaqësinë e bashkëpunimit me shoqatën «Tirana», por edhe detyrën historike për vetë lidhjet që Biblioteka Kombëtare ka me jetën politike dhe shoqërore të Tiranës. “Është një fat i lumtur që të dyja ngjarjet – shpallja kryeqytet e Tiranës dhe krijimi i Bibliotekës Kombëtare – janë të lidhura pazgjidhshmërisht në ngrehinën e kësaj ndërtese, në të cilën është ngritur edhe flamuri kombëtar më 26 nëntor 1912”, tha ai.

Z. Plasari i dhuroi edhe medalionin e 90-vjetorit të themelimit të BKSH, shoqatës «Tirana» nëpërmjet kryetarit të saj.

Znj. Nevila Nika, drejtoreshë e Arkivit Qendror të Shtetit, foli për fazat e zhvillimit të hershëm të qytetit të Tiranës, “qytet tashmë i të gjithëve, dhe jo vetëm i tiranasve”, duke kujtuar me nostalgji Tiranën e vjetër, një pjesë e mirë e ndërtesave të vjetra të së cilës tashmë nuk ekzistojnë më.

Në mjediset e Bibliotekës Kombëtare është ekspozuar edhe riprodhimi i një harte të vjetër venedikase, “Mare Adriatico, o Golfo di Venezia. Albania propria ouero superiore” e vitit 1689, ku Tirana – Terrana – shfaqet për herë të parë në hartografi.