Ngjarje

EKSPOZITA “SHENJTORË TË SHQIPËRISË”

 

Në kuadër të veprimtarive përkujtimore të zhvilluara nga Ministria e Turizmit, Kulturës, Rinisë dhe Sporteve në 10 - vjetorin e vdekjes së Nënë Terezës (5-15 shtator 2007) Biblioteka Kombëtare organizoi më 7 shtator 2007 ceremoninë e çeljes për herë të parë për publikun të ekspozitës “Shenjtorë të Shqipërisë”.

Në ceremoni morën pjesë z. Ylli Pango, ministër i Turizmit, Kulturës, Rinisë dhe Sporteve; z. Genc Pollo, ministër i Arsimit dhe Shkencës; deputetë, përfaqësues të ambasadave të huaja të akredituara në Tiranë, studiues, lexues etj.

Drejtori i Bibliotekës Kombëtare, z. Aurel Plasari, në fjalën hyrëse shprehu, mes të tjerash, kënaqësinë e veçantë të përurimit të ekspozitës me materiale që paraqet veprimtarinë e shenjtorëve iliro-shqiptarë duke filluar që nga Shën Asti i Durrësit. Ai theksoi gjithashtu se, si e para e këtij lloji, kjo ekspozitë i dha Bibliotekës Kombëtare shansin dhe kënaqësinë e promovimit të botimeve me vlera të shquara që ajo ruan në koleksionet e saj. Z. Plasari e cilësoi ekspozitën si shprehje të dëshirës dhe vullnetit të mirë për të evidentuar këtë pjesë të rëndësishme të trashëgimisë sonë.

Z. Ylli Pango, në fjalën e përshëndetjes, vlerësoi veprimtaritë cilësore dhe mjaft interesante që organizon vijimisht Biblioteka Kombëtare e drejtuar nga z. Plasari.

Ekspozita çelet me një eksponat ku janë vendosur botime të autorëve shqiptarë dhe të huaj për Nënë Terezën, si monografi, albume etj. në gjuhë të ndryshme të botës. Në to pasqyrohet shpirti i madh i kësaj humanisteje të shquar dhe veprimtaria e saj në përkrahaje të shtresave dhe individëve të varfër, të sëmurë, të nëpërkëmbur etj.

Në vitrina të veçanta janë ekspozuar materiale bibliotekare që u bëjnë jehonë figurave të ndritura të 15 shenjtorëve ilirë, shqiptarë dhe të huaj, të cilët kanë jetuar dhe vepruar në trojet shqiptare. Në krye të çdo vitrine janë vendosur jetëshkrimet e këtyre shenjtorëve, në të cilat, në mënyrë të përmbledhur, është pasqyruar jeta dhe veprimtaria e tyre.