Ngjarje

Ekspozita “Biblioteka e Bushatllinjve” në Shkodër…

 

Dita e fundit e majit të vitit në vijim shënoi një veprimtari të pazakontë për Bibliotekën Kombëtare: nën masa sigurie të parashikuara nga legjislacioni për bibliotekat dhe ai për trashëgiminë kulturore lëvizi drejt kryeqendrës së Veriut, e shoqëruar nga forca të policisë së shtetit, një ndër pjesët më të rëndësishme të koleksionit të orientalistikës që ruhet në Bibliotekën Kombëtare, përzgjedhja e Bibliotekës së Bushatllinjve.

Ekspozita u organizua në mjediset e bibliotekës “Marin Barleti” të qytetit nën kujdesin e kryetarit të Bashkisë së Shkodrës z. Lorenc Luka. Në ceremoninë inauguruese fjalën e mirëseardhjes e mbajti z. Gjovalin Çuni, drejtor i kësaj biblioteke, i cili falënderoi të pranishmit dhe autoritetet që merrnin pjesë në ceremoni. Ai falënderoi në mënyrë të posaçme kryetaren e Kuvendit të Shqipërisë znj. Jozefina Topalli, drejtorin e Bibliotekës Kombëtare z. Aurel Plasari dhe kryetarin e Bashkisë së Shkodrës z. Lorenc Luka, i pranishëm në ceremoni, që mundësuan çeljen e kësaj ekspozite në qytetin e tyre.

Një fjalë të rastit e mbajti z. Aurel Plasari. Ai e përshkroi si ditë gëzimi ditën kur ekspozita me eksponate të Bibliotekës së Bushatllinjve erdhi në Shkodër nën idenë e konceptit bashkëkohor të “bibliotekave pa mure”. “Për bibliotekën Kombëtare,- theksoi ai,- është hera e parë që del jashtë kryeqytetit. Dhe del simbolikisht me Shkodrën, çfarë është një kënaqësi për ne. Prejardhja e kësaj biblioteke është tregues i traditave të shkëlqyera kulturore të Shkodrës. Z. Plasari shpjegoi se materialet e kësaj ekspozite ishin përzgjedhur me kujdes mes dorëshkrimeve dhe botimeve të shumta të Bibliotekës së Bushatllinjve, që shquhen për larminë dhe rëndësinë e përmbajtjes së tyre jo vetëm fetare por edhe nga fusha të tilla si filozofia, letërsia, kozmografia, jurisprudenca, logjika, retorika, administrata etj.”. Literatura e ekspozuar ishte në gjuhët persisht, arabisht dhe osmanisht, ndërkohë që në koleksionin e Bushatllinjve që ruan Biblioteka Kombëtare ka shumë libra të gjuhëve dhe kulturës perëndimore. “Shpresojmë,- tha duke përfunduar z. Plasari,- që së bashku me kënaqësinë t’u japim vizitorëve të kësaj ekspozite edhe një informacion tej mase interesant, i cili do të plotësojë një kureshtje shkencore dhe kulturore”.

Me interes u dëgjua edhe fjala e z. Nexhmi Bushati, i cili foli në emër të shoqatës “Karamahmud Pasha”. Ai theksoi se kjo ekspozitë nuk ishte një eveniment lokal, por një veprimtari europiane konceptuar nën nismën e z. Aurel Plasari, i cili nuk ka organizuar një ekspozitë rutinë, por pasuroi kulturën tonë dhe atë europiane me një dukuri që ka emrin “Biblioteka e Bushatllinjve”. Folësi nënvizoi se z. Plasari vijoi dhe çoi më tej përpjekjet e orientalistëve si Hamdi Bushati dhe Zyber Bakiu duke ringjallur këtë bibliotekë të shquar.

Shiritin e ekspozitës e prenë z. Aurel Plasari dhe z. Willy Kamsi, figurë e shquar e bibliotekarisë dhe albanologjisë.

Ekspozita qëndroi e hapur për dy ditë dhe, po nën shoqërimin e policisë, u kthye në Tiranë për t’u vendosur në mjediset e arkivit të Bibliotekës Kombëtare, gjithnjë e hapur për t’iu shërbyer studiuesve nga i gjithë vendi.