Ngjarje

Konferenca shkencore ndërkombëtare “Bibliotekat në epokën digjitale”

 

Biblioteka Kombëtare e Shqipërisë, në bashkëpunim me Ambasadën e Shteteve të Bashkuara të Amerikës në Tiranë, organizoi më 28-29 shtator të vitit në vijim në mjediset e saj konferencën shkencore ndërkombëtare “Bibliotekat në epokën digjitale”. Përveç drejtuesve dhe specialistëve të Bibliotekës Kombëtare të Shqipërisë, të Bibliotekës Kombëtare dhe Universitare të Kosovës, të bibliotekave publike, universitare dhe institucionale të Shqipërisë dhe Kosovës, punonjësve të American Corner në Shqipëri dhe Kosovë, merrnin pjesë edhe z. Jason M. Yasner, zv/drejtor i Bibliotekës Botërore Digjitale (BBD) pranë Bibliotekës së Kongresit në Uashington, z. Grant G. Harris i Bibliotekës së Kongresit, mes të tjerash edhe kurator i koleksioneve shqiptare atje dhe z. Aaron J. Trehub, zv/dekan për teknologjinë në Universitetin e Auburnit në Alabama.

Në ceremoninë e çeljes së kësaj konference nderuan me pjesëmarrjen e tyre znj. Zana Turku, zv/ministre e Turizmit, Kulturës, Rinisë dhe Sporteve; znj. Deborah A. Jones, e ngarkuara me punë e Ambasadës Amerikane; z. Sali Bashota, drejtor i Bibliotekës Kombëtare dhe Universitare të Kosovës etj.

Fjalën e hapjes e mbajti znj. Etleva Domi, zv/drejtore e Bibliotekës Kombëtare. Ajo theksoi se punimet e kësaj Konference zhvillohen në një kohë kur flitet për procese integrimesh e globalizimesh, kur diskutohet për përqasje në burime digjitale dhe bëhen përpjekje për krijime portalesh, ndërmerren nisma dhe projekte për përfshirje në rrjetin global jo vetëm të bibliotekave, por edhe të muzeve dhe arkivave. “Konferenca,- nënvizoi znj. Domi,- shënon një ngjarje jo të zakontë për zhvillimet e bibliotekonomisë shqiptare. Në këtë kuadër, janë ndërmarrë e vijojnë të ndërmerren nisma digjitale, qofshin këto në nivel lokal, kombëtar apo edhe më gjerë, dhe dita-ditës koleksionet me vlerë kombëtare po pasqyrohen gjithnjë e më shumë në portale euro-atlantike, në portale që flasin tanimë edhe shqip”.

Në hapjen e konferencës u lexua letra që z. James H. Billington, drejtor i Bibliotekës së Kongresit në Uashington, në pamundësi të pjesëmarrjes në konferencë, i ka dërguar drejtorit të Bibliotekës Kombëtare të Shqipërisë Prof. Dr. Aurel Plasari.

Në përshëndetjen e saj znj. Deborah Jones theksoi se kjo Konferencë organizohet në kuadër të festimit këto ditë të rivendosjes së marrëdhënieve diplomatike midis ShBA dhe Shqipërisë. Ajo u shpreh e kënaqur për urat e bashkëpunimi të frytshëm që janë vendosur midis Ambasadës së ShBA në Tiranë dhe Bibliotekës Kombëtare. “Biblioteka Kombëtare e Shqipërisë tashmë është anëtare e Bibliotekës Botërore Digjitale,- nënvizoi znj. Jones,- çfarë tregon arritjet e këtij institucioni dhe punën me standarde ndërkombëtare bashkëkohore”. Ajo i dorëzoi z. Aurel Plasari Kartën e anëtarësimit të Shqipërisë, nëpërmjet Bibliotekës së saj Kombëtare, në Bibliotekën Botërore Digjitale, partneritet i Bibliotekës së Kongresit dhe UNESCO-s.

Z. Plasari, duka falënderuar për marrjen e Kartës së anëtarësimit me të drejta të plota të Bibliotekës Kombëtare të Shqipërisë në këtë organizim bibliotekar mbarëbotëror, i dorëzoi si dhuratë përfaqësueses së Ambasadës Amerikane në Tiranë një kopje të versionit të digjituar të koleksionit të revistës Albania. “Për dy arsye simbolikisht kemi zgjedhur t’ju dhurojmë këtë koleksion të digjituar: së pari, Faik Konica ka qenë ambasador i Shqipërisë në Uashington, një shqiptar i madh dhe njëkohësisht amerikan i shquar; së dyti, ky material do të jetë simbolikisht i pari që do të depozitohet në Bibliotekën Botërore Digjitale”.

Në emër të Ministrisë së Turizmit, Kulturës, Rinisë dhe Sporteve konferencën e përshëndeti znj. Zana Turku, e cila, pasi uroi këtë anëtarësim të Bibliotekës Kombëtare, nënvizoi rëndësinë e qasjes së ndërsjellë të kulturave të ndryshme në mjedisin digjital. “Qeveria,- u shpreh ajo,- ndër prioritetet në fushën e kulturës ka edhe digjitimin e trashëgimisë kombëtare për të qenë edhe Shqipëria me vlerat e saj pjesë e familjes europiane dhe asaj botërore. Dhe modeli më i mirë për këtë është puna e Bibliotekës Kombëtare për përfshirjen në Bibliotekën Europiane dhe Bibliotekën Botërore Digjitale”.

Në seancën e dytë, më 29 shtator, lektorët e ardhur nga ShBA mbajtën referate për ecurinë e bibliotekave në epokën e sotme të karakterizuar nga zhvillimet digjitale. Përmes kumtimeve të tyre shkencore ata sollën zhvillimet më të fundit të bibliotekave amerikane në mjedisin digjital.

Z. Jason Yasner mbajti referatin “Biblioteka Digjitale Botërore: panoramë e përgjithshme”. Pasi foli për misionin e BBD që të digjitojë dhe mundësojë qasjen në Internet të materialeve që flasin për historinë e të gjitha vendeve dhe arritjet e tyre, z. Yasner u ndal në objektivat e kësaj biblioteke, nxitjen e mirëkuptimit dhe të identitetit kombëtar dhe ndërkulturor, ngushtimin e hendekut digjital etj. Pastaj ai paraqiti karakteristikat e website-it të BBD, partnerët dhe statistikat e përdoruesve, strukturën administrative të saj etj.

“Nismat digjitale në Bibliotekën e Kongresit” ishte titulli i referatit të mbajtur nga z. Grant Harris. Lektori u ndal gjatë në programin e Bibliotekës së Kongresit Kujtesa amerikane, me sektorët e Dorëshkrimeve, Gravurë & fotografive dhe Gjeografi & hartave për të kaluar te Qendra amerikane e traditës popullore. Tërhoqën vëmendjen e pjesëmarrësve problematika të tilla si programi kombëtar i digjitimit të gazetave, digjitimi i librave amerikanë dhe sidomos arkivimi i web-eve.

Kurse z. Aaron Trehub trajtoi temën “Bibliotekat në epokën digjitale: përvojë nga Shtetet e Bashkuara”. Pasi dha një informacion të shkurtër mbi Universitetin e Auburnit në Alabama dhe bibliotekat e tij, folësi u ndal te bibliotekat e gjeneratës së ardhshme duke i karakterizuar ato si vende publike, ente botuese digjitale, laboratorë dhe baza testimi dhe si qendra ndihme dhe administruese digjitale.

Konferenca ia arriti qëllimit: tanimë pjesëmarrësit në të kanë një pamje më të plotë për bibliotekat në epokën e sotme të quajtur digjitale. Mbetet detyrë e bibliotekave tona përmirësimi i punës për ridimensionimin e rolit dhe funksioneve të tyre në partneritet me institucione të tjera të kujtesës si arkivat dhe muzetë; përfshirja në zhvillimet e diktuara nga puna në mjedisin digjital; aftësimi në teknologjinë digjitale dhe përmirësimi i proceseve bibliotekare dhe i shërbimeve për përdoruesit.