Ngjarje

Fishta mes dy bibliotekave

 

Një ngjarje të pazakontë shënoi çelja në Ditën e Flamurit në mjediset e Bibliotekës Kombëtare të ekspozitës “Fishta mes dy bibliotekave” e sjellë në Tiranë për vizitorët e kryeqytetit nga biblioteka “Marin Barleti” e Shkodrës. Një praktikë e re po lind tashmë në shkëmbimin e ndërsjellë të vlerave të trashëgimisë së shkruar kombëtare që këto dy biblioteka ruajnë në koleksionet e tyre. Përveç studiuesve, gazetarëve, lexuesve dhe punonjësve të bibliotekave morën pjesë në ceremoninë e rastit znj. Jozefina Topalli, kryetare e Kuvendit të Shqipërisë, z. Aldo Bumçi, ministër i Turizmit, Kulturës, Rinisë dhe Sporteve dhe personalitete të tjera.

Z. Aurel Plasari, drejtor i Bibliotekës Kombëtare, mbajti fjalën e përshëndetjes. Pasi mirëseardhi pjesëmarrësit në veprimtari, ai tha: “Jemi mbledhur të ndajmë së bashku përkujtimin e ngjarjes së madhe të Ditës së Pavarësisë duke organizuar këtë ekspozitë me libra vetjakë të Fishtës, e cila fillimisht u çel para disa ditësh në bibliotekën e Shkodrës për të ardhur në këtë Ditë Festive në mjediset e Bibliotekës sonë këtu në Tiranë”. Duke vijuar z. Plasari u shpreh se institucioni që ai drejton ndihet i nderuar me këtë ekspozitë dhe se ajo me siguri do të ngjallë kërshërinë dhe interesin e vizitorëve kryeqytetas. Pasi bëri një paraqitje të përmbajtjes së ekspozitës, ai premtoi kontributin e Bibliotekës Kombëtare, në bashkëpunim me bibliotekën “Marin Barleti”, për përgatitjen e një katalogu-album që do të përfshijë gjithçka të rekuperuar që i përket bibliotekës së Fishtës.

Bashkideatorja e Ekspozitës znj. Rezarta Draçini shpalosi synimet e kësaj ekspozite që përmban rreth 100 njësi bibliotekare të organizuara sipas tematikave të ndryshme njëra më interesante se tjetra. Pasi evidentoi madhështinë e figurës së Fishtës, ajo u ndal në historikun e Bibliotekës Françeskane dhe kontributin e Fishtës në themelimin dhe pasurimin e saj.

Z. Gjovalin Çuni, drejtor i bibliotekës “Marin Barleti” dhe bashkëideator i ekspozitës, falenderoi z. Aurel Plasari që mundësoi sjelljen në Tiranë të kësaj ekspozite me vlera të shumëfishta. Ai i dhuroi znj. Jozefina Topalli një kopje digjitale të koleksionit të revistës “Hylli i Dritës”, po ashtu edhe zz. Aldo Bumçi dhe Aurel Plasari. Digjitimi i kësaj reviste të shquar, theksoi ai, shënon fillimin e ngritjes së bibliotekës digjitale me koleksionet e pasura të bibliotekës së Shkodrës.

Të pranishmit vizituan eksponatet e kësaj ekspozite duke parë për së afërmi botimet e zgjedhura me kujdes dhe profesionalizëm. Ato përmbanin materiale në gjuhë të ndryshme, të llojeve të ndryshme, veç atyre letrare, albanologjike dhe fetare, si filozofi, jurisprudencë, arkitekturë etj. Ekspozita niste me antikuarë, më i vjetri i vitit 1556, libra me dedikime të Fishtës për miqtë, libra të tjerë dhuruar Fishtës me dedikime të personaliteteve të ndryshme të kohës. Tërhoqën vëmendjen sidomos dorëshkrimet e poemës së famshme “Lahuta e Malcis” me shënime dhe korrektura të vetë autorit, po ashtu edhe ekzemplarë të revistës “Hylli i Dritës” me ndreqje, heqje dhe shtesa të Fishtës në artikujt e botuar aty prej tij. Ngjallën interes edhe dy procesverbale të mbajtura në raste konfiskimesh të bibliotekave të shquara të institucioneve fetare në qytetin e Shkodrës; një pjesë e mirë e tyre u përket vlerave të rralla që zë kryet e vendit në vlerat e koleksioneve që bartin në fondet e veta bibliotekat shqiptare.