Ngjarje

Bandë muzikore, fishekzjarrë, dhurime librash, dhurime lulesh: 100 vjetori i Mitrush Kutelit

 

Më 13 shtator 2007 Biblioteka Kombëtare organizoi në mjediset e saj ceremoninë festive në përkujtim të 100-vjetorit të lindjes së Mitrush Kutelit, personalitet i letrave dhe kulturës shqiptare. Morën pjesë shkrimtarë, studiues, botues, njerëz të arteve dhe kulturës, lexues etj. Nderuan me pjesëmarrjen e tyre përfaqësues të familjeve të shkrimtarëve bashkëkohës të Kutelit, si të Lasgush Poradecit, të Sterjo Spasses, të Vedat Kokonës, të botuesit Malosmani etj.

Para fillimit të veprimtarisë në mjedisin përpara ndërtesës së Bibliotekës Kombëtare banda frymore e qytetit luajti pjesë të ndryshme muzikore. Në ballë të sallës ku u organizua ceremonia ishte vendosur portreti i madh i Mitrush Kutelit, i ndriçuar dhe i zbukuruar me lule në shenjë nderimi.

Fjalën e hapjes së ceremonisë e mbajti Aurel Plasari, drejtor i Bibliotekës Kombëtare, i cili, pasi u uroi të pranishmëve mirëseardhjen, theksoi se kjo veprimtari organizohet në kuadër të “Vitit Kuteli” të shpallur nga Ministria e Turizmit, Kulturës, Rinisë dhe Sporteve me rastin e jubileut të lindjes së tij. Ai u ndal në prurjet e Kutelit në disa fusha të kulturës, duke ngulmuar, për raste përvjetorësh të tillë, në parimin e Croces se historia regjistron ato çfarë shkrimtarët bëjnë dhe jo ato çfarë ata vuajnë e heqin.

Në përshëndetjen e tij, z. Ylli Pango, ministër i MTKRS, vuri në dukje se Mitrush Kuteli u përket atyre figurave të mëdha të kulturës shqiptare të lëna në harresë apo të neglizhuara për arsye nga më të ndryshmet, ndaj ceremoni të tilla marrin vlera të shumfishta në promovim të trashëgimisë kulturore të popullit tonë. Ministri Pango, me këtë rast, bëri thirrjen për më shumë dashamirësi e respekt ndaj figurave të mëdha të letërsisë e të kulturës, në kundërvënie me shenja jo të denja denigrimesh të reja ndaj tyre edhe në ditën e sotme.

Me interes u dëgjua përshëndetja e ambasadorit të Republikës së Rumanisë z. George Micu, i cili kujtoi lidhjet e veprës dhe figurës së Mitrush Kutelit me Rumaninë, si vend ku shkrimtari u shkollua, u formua e punoi gjatë një pjese të jetës së tij, si edhe ku filloi të botonte punimet e tij të para jo vetëm në fushën e ekonomisë e të bankës, por edhe të prozës, të poezisë, të kritikës letrare etj.

Drejtori i Bibliotekës Kombëtare dhe Universitare të Prishtinës z. Sali Bashota, pasi vlerësoi madhështinë e personalitetit të Mitrush Kutelit, theksoi vlerësimin e lartë të figurës së tij në Kosovë. Ai i dhuroi Bibliotekës Kombëtare kopje të ribotimit të monografisë së shkruar prej tij “Mitrush Kuteli: prozator, poet, kritik”. Në ceremoni u promovua edhe botimi “Shënime letrare”, i cili përmbledh opusin kritik të mendimtarit Kuteli. Për vlerat e botimit folën botuesja Donika Omari dhe filologu Agron Gjekmarkaj. Në emër të familjes foli znj. Atalanta Pasko, e cila, e emocionuar, përshëndeti organizatorët e ceremonisë dhe MTKRS.

Të pranishmit vizituan edhe ekspozitën me botime dhe shkrime të Mitrush Kutelit nga koleksionet e Bibliotekës Kombëtare, hapur në katin përdhes të institucionit. E gjithë vepra shkrimore e Kutelit ishte ekspozuar sipas kësaj renditje të përmbatjes: Rrëfime-rrëfenja, Kritikë letrare, Kuteli editor, Ekonomike, Poezi, Përralla-folklor, Tregime të moçme shqiptare dhe Përkthime. Në një eksponat më vete ishin vendosur botime të ndryshme monografike për veprën dhe jetën e këtij autori të shquar. Ngjalli interes edhe ekspozimi për herë të parë i tri botimeve të Kutelit që nuk kanë arritur të qarkullojnë dhe që u përkasin kohëve të ndryshme.

Atmosferën festive e ndezën edhe më shumë fishekzjarrët që llamburitën mjediset para bibliotekës në çastin kur z. Plasari u dhuroi familjarëve të Kutelit një tufë të madhe me lule, si dhe hapjet e shisheve të shampanjës.