Ngjarje

"Koha e memorandumeve", ekspozitë në Bibliotekën Kombëtare

 

Më 2 nëntor 2012 u çel në mjediset e Bibliotekës Kombëtare ekspozita me një përzgjedhje materialesh bibliotekare të shpallura publikisht, nga periudha e Lidhjes së Prizrenit deri në Kongresin e Lushnjës, si memorandume, thirrje, protesta dhe kërkesa pranë Fuqive të Mëdha, konferencave ndërkombëtare etj. për çështjen shqiptare. Janë ekspozuar rreth 50 ekzemplarë libra, broshura, dorëshkrime dhe ekstrakte të hartuar nga shqiptarë brenda e jashtë Shqipërisë, por edhe nga miq të huaj të saj.

Në këtë ceremoni mori pjesë Kryeministri Sali Berisha, ministri i Turizmit, Kulturës, Rinisë dhe Sporteve Aldo Bumçi, deputetë, përfaqësues të ambasadave të huaja në Tiranë, personalitete të shkencës dhe kulturës etj.

Në fjalën e tij drejtori i Bibliotekës Kombëtare Aurel Plasari, pasi përshëndeti Kryeministrin Berisha, falënderoi Komitetin Shtetëror të festimeve të 100-vjetorit të shpalljes së Pavarësisë që mundësoi fillimin e veprimtarive të planifikuara për muajin jubilar të Nëntorit me Bibliotekën Kombëtare, institucioni më i vjetër kulturor i shtetit shqiptar. “Shpresoj,- vijoi z. Plasari,- që përzgjedhja nga ana jonë të jetë e qëlluar dhe kjo ekspozitë t’i përgjigjet interesit të publikut. Ju ftoj që së bashku të shijojmë edhe disa surpriza që kanë të bëjnë me disa materiale vërtetë të rralla”.

Ministri Bumçi theksoi në fjalën e tij se ekspozita u shërben dy funksioneve: së pari, të njohë vizitorët me një pjesë të historisë sonë dhe së dyti, të vlerësojë dhe t’u bëjë homazh të gjithë atyre që kontribuan me mjete të kësaj natyre për Pavarësinë dhe forcimin e shtetit shqiptar.

Pasi vizitoi ekspozitën, Kryeministri Berisha shprehu vlerësimin për të dhe nënvizoi se këto dokumente qëndrojnë në themel të përpjekjeve politike dhe diplomatike të shqiptarëve për të ndërtuar shtetin e tyre të pavarur: "Jam këtu për të përshëndetur përzemërsisht drejtuesit dhe punonjësit e Bibliotekës Kombëtare për këtë ekspozim të shkëlqyer të dokumenteve të qëndrojnë në themel të përpjekjeve politike dhe diplomatike të shqiptarëve, për të ndërtuar shtetin e tyre të pavarur. Nga një vështrim i shpejtë, ajo që bie në sy është një zgjim i madh i shqiptarëve në të gjitha trojet etnike dhe shqiptarëve në diasporë e kudo që ndodhen. Kjo përbën një nga habitë e mëdha të kohës, pasi kombi, për shekuj në një perandori tjetër, zgjohet me një ndërgjegje kombëtare që do ta udhëheqë atë dhe do ta frymëzojë në një betejë të madhe për pavarësinë e Shqipërisë. Shumë mbresëlënëse janë dokumentet e Lidhjes së Prizrenit, të cilat mishërojnë në mënyrën më të shkëlqyer idealin e bashkimit kombëtar, idealin më fisnik të shqiptarëve, ideal që do t'i frymëzojë ata, në çdo kohë, për zhvillim, për bashkim dhe horizonte të reja. Ky ideal, në fakt, frymëzoi shqiptarët, në çdo moment të vështirë të historisë së tyre, që të qëndrojnë së bashku dhe sot është më frymëzues se kurrë ndonjëherë. Ndaj, unë dua të shpreh nderimin tim, të të gjithë shqiptarëve, për autorët, etërit dhe frymëzuesit e këtyre dokumenteve”.