Ngjarje

Koleksionet albanologjike në shërbim të historisë së Shqipërisë

 

Në kuadër të veprimtarive festive të 100-vjetorit të shpalljes së Pavarësisë, më 8-9 nëntor 2012 u organizua në Tiranë edicioni i shtatë i konferencës shkencore Shqipëri-Kosovë. Si organizim i përbashkët i Bibliotekës Kombëtare të Shqipërisë (BKSh) dhe Bibliotekës Kombëtare dhe Universitare të Kosovës (BKUK) në këtë vit jubilar tema e zgjedhur ishte domethënëse: Koleksionet albanologjike në shërbim të historisë së Shqipërisë. Merrnin pjesë punonjës nga të dy bibliotekat, si edhe nga bibliotekat e tjera të të dy vendeve.

Fjalën e hapjes e mbajti Prof. dr. Aurel Plasari, drejtori i BKSh-së. Mes të tjerash ai tha se ndihemi të gëzuar që kemi mbërritur në këtë edicion të shtatë që mbahet në 100-vjetorin e shpalljes së Pavarësisë, çfarë e bëri të lehtë dhe natyrshme gjetjen e temës së tij, e cila lidhet me kontributin që japin bibliotekat me koleksionet e tyre për historiografinë. “Personalisht,- tha ai,- asnjë nga punët e mia modeste nuk do t’i kisha kryer dot pa “bibliotekën”. Bibliotekat ndihmojnë me huazimin dhe shkëmbimin e burimeve dhe marrjen e informacionit mbi to, aq të domosdoshme këto për punën e historianit, pikërisht prandaj menduam se kjo ishte tema që ia vlen të trajtohet”. Z. Plasari vuri në dukje edhe interesin dhe kërkesat e shumta të mjaft institucioneve tradicionale të shtetit shqiptar për materiale që Biblioteka Kombëtare ruan në koleksionet e veta, të cilat rezultojnë shumë të dobishme për të shkruar historinë e tyre.

Në fjalën e tij Prof. dr. Sali Bashota, drejtor i BKUK, gjithashtu shprehu gëzimin që edicioni i sivjetëm i Konferencës mbahet në Nëntorin e festimeve për nder të Pavarësisë. Ai vuri në dukje bashkëpunimin e ngushtë dhe të frytshëm midis dy bibliotekave jo vetëm në organizimin e konferencave shkencore të përbashkëta, por edhe në fushat e tjera të veprimtarive të tyre. Z. Bashota u ndal në mënyrë të veçantë në realizimin e konceptimit, realizimit dhe funksionimit të portalit të përbashkët albanologjik si një kontribut me vlerë në sigurimin e informacionit bibliografik dhe të burimeve për disiplinat albanologjike. Ai u shpreh optimist për vijimin dhe intensifikimin e bashkëpunimit me BKSh, gjithmonë në dobi të forcimit të identitetit tonë kombëtar dhe kulturor.

Konferencën e përshëndeti edhe z. Aldo Bumçi, ministër i Turizmit, Kulturës, Rinisë dhe Sporteve. “Kjo konferencë,- theksoi ai,- i shërben qëllimit kryesor dhe më të rëndësishëm që ne kemi synuar në këtë 100-vjetor: nxitjen e debatit për historinë e Shqipërisë. Shpresoj që konferenca t’i shërbejë kësaj”. Pastaj ai përgëzoi dy bibliotekat për bashkëpunimin e suksesshëm, portalin e përbashkët albanologjik Shqipëri-Kosovë dhe organizimin e rregullt institucional të edicioneve të kësaj konference. Duke përfunduar, Ministri përgëzoi drejtuesit e të dy bibliotekave për bashkëpunimin, të cilin ai e cilësoi të shkëlqyer.

Në konferencë u mbajtën kumtesat Mit’hat Frashëri për studimin e historisë së Shqipërisë (Prof. Dr. Luan Malltezi), Biblioteka, burimet, studiuesi (Dr. Ramazan Vozga), Trashëgimia albanologjike shqiptare dhe kujtesa historike (Prof. as. Osman Gashi), Lef Nosi dhe koleksionet albanologjike në shërbim të historisë kombëtare (Prof. as. Kujtim Bevapi), Ndikimi i shtypit shqiptar në lëvizjet për pavarësinë e Shqipërisë (Bukurije Haliti), Një shekull i shtypit shqiptar në bibliografinë e periodikut (Maksim Gjinaj), Prurje albanologjike në gjuhën gjermane: Bopp, Hahn, Lambertz (Lavdije Rrahmani) dhe Koleksioni në gjuhën angleze për shqiptarët në fondet e BKUK-së (Berat Dakaj).