Ngjarje

Ndahet Çmimi i Bibliofilisë “Lumo Skendo” për vitet 2010 dhe 2011

 

Më 15 nëntor 2012 u zhvillua në sallën “Lumo Skendo” të Bibliotekës Kombëtare ndarja e Çmimit të bibliofilisë për vitet 2010 dhe 2011. Në ceremoninë e rastit merrnin pjesë botues, shkrimtarë, përfaqësues të medias etj.

Kryetari i jurisë Aurel Plasari theksoi faktin që në këtë ceremoni të thjeshtë në ditët më të ngarkuara të ceremonive të 100-vjetorit të shpalljes së Pavarësisë, por të rëndësishme për nga emri që mban salla, njoftohej dhe ndahej Çmimi i Bibliofilisë për dy vitet e kaluara. Pasi tha se ishin veçuar nga tërësia e prurjeve të këtyre dy viteve një mori botimesh të realizuara nga disa botues të njohur, mes tyre edhe fitues të edicioneve të mëparshme, ai njoftoi se juria kishte vendosur njëzëri që për vitin 2010 çmimi “Lumo Skendo” t’i jepej shtëpisë botuese “Onufri” për botimin e veprave të plota të Martin Camajt dhe për vitin 2011 shtëpisë botuese “Toena” për albumin “Princi i Shqiptarëve, Wilhelm von Wied” të Artan Lames.

Duke marrë në dorëzim trofeun e Çmimit, drejtori i shtëpisë botuese “Onufri” Bujar Hudhri tha se ishte vërtetë i emocionuar, sepse vonesa e ndarjes së këtij Çmimi sjell një koincidencë të lumtur të marrjes së tij në 100-vjetorin e Pavarësisë, po ashtu edhe të 20-vjetorit të krijimit të shtëpisë së tij botuese. “Vepra e plotë e shkrimtarit të madh Martin Camaj,- theksoi botuesi,- paraprihet nga një hyrje e shkrimtarit me famë botërore Ismail Kadare dhe nga parathënia e personalitetit të letrave shqipe Ernest Koliqi. Edhe skicë-portreti i Camajt në kopertinë është punë e piktorit gjithashtu me famë botërore Ibrahim Kodra”.

Në emër të Botimeve Toena medaljonin e çmimit për vitin 2011 e mori Prof. dr. Jorgo Bulo, drejtor i bordit të botimeve i Institutit të Librit dhe të Promocionit Toena. “Falënderoj jurinë dhe Ministrinë e Turizmit, Kulturës, Rinisë dhe Sporteve për këtë çmim të rëndësishëm, të cilin e konsiderojmë si vlerësim për punën e institutit tonë,- tha mes të tjerash ai.- Edhe për Botimet Toena ky çmim vjen në përvjetorin e 20-të të krijimit të saj”.

I pranishëm në ceremoni, fjalën e mori edhe z. Aldo Bumçi, ministër i Turizmit, Kulturës, Rinisë dhe Sporteve. Ai përgëzoi dy shtëpitë botuese fituese për botimet cilësore që kanë realizuar. “Çmimi kombëtar bibliofilik është i veçantë,- theksoi Ministri,- dhe tashmë ka krijuar traditë. Ai synon të nxitë cilësinë estetike dhe tipografike të librit. Ky çmim lidhet me emrin e Lumo Skendos, një personalitet i shquar i kulturës shqiptare dhe i shkencës së albanologjisë, dhe ndihmon për ta nxjerrë atë nga harresa si krijues të bibliofilisë shqiptare. Duke nderuar atë,- përfundoi ai,- ne sjellim vlera të harruara dhe të dënuara padrejtësisht”.



Çmimi i Bibliofilisë “Lumo Skendo” për vitin 2010



Çmimi i Bibliofilisë “Lumo Skendo” për vitin 2011