Ngjarje

Prof. dr. Aurel Plasari nderohet nga Kuvendi i Shqipërisë

 

Një veprimtari krejt e veçantë u organizua më 16 nëntor 2012 në mjediset e Kuvendit të Shqipërisë, i cili, në vitin jubilar të 100 vjetorit të shpalljes së Pavarësisë, nderoi për kontributin e tyre 48 personalitete të letrave, artit dhe humanizmit. Në shenjë nderimi dhe mirënjohjeje Kryetarja Jozefina Çoba Topalli dhuroi për artistë, shkrimtarë, njerëz të letrave, mjekë etj. botimin special të Kuvendit të Shqipërisë ”Aktet e themelimit të shtetit shqiptar”.

Në fjalën e rastit znj. Topalli u shpreh se artistët kanë qenë dhe janë miqtë e vërtetë të shqiptarëve. “Ata u bënë njerëz të ndryshimit,- vijoi ajo.- Shqiptarët i besuan atyre dhe ata nuk i tradhtuan shqiptarët. Ne kemi nevojë për ta si për ajrin”. Më tej, duke iu referuar thënies së Fishtës menjëherë pas Shpalljes së Pavarësisë se “Tash që u ba Shqypnija, duhen ba shqyptarët”, Kryetarja e Kuvendit tha: “Tingëllon kjo frazë sa therëse, sa ironike, e idhët, si e vërteta. Po kush do t’i bënte shqiptarët që të ndjeheshin shqiptarë? Natyrisht ky qe misioni më i rëndë, më sfidant, më kryeneç, më jetësor që i binte mbi shpinë veçse njerëzve të kulturës. Më mirë me thanë: punëtorëve të kulturës. Këtyre mjeshtrave idealistë që nisën të ndërtonin gur mbas guri ngrehinën e identitetit kulturor shqiptar. U desh të dëshmohej më së pari se jemi sa njëlloj në dinjitet po aq edhe të ndryshëm në kulturë.

Nisi kështu puna e madhe e këtyre iluministëve të gërmonin rrënjët e këtij identiteti. Të gërmonin tokën prej së cilës do mbinin kolonat e ngrehinës së identitetit: kolona e parë: gjuha shqipe, kolona e dytë: eposi i kreshnikëve, kolona e tretë: kanunet dhe statutet dhe kolona e katërt: përrallat kombëtare. Mbi këto katër shtylla ne mund ta ndërtonim tempullin tonë. Mund ta zbukuronim atë me letërsi, me muzikë, me pikturë, skulpturë dhe fotografi, me teatër dhe kinema, me balet dhe opera e me të gjitha ekspresionet e tjera përherë e më të holla artistike. Kështu gjeneratat e shkrimtarëve dhe artistëve u bënë përherë e më të pranishme në jetën e vendit. Ato u bënë njerëz të ndryshimit, që shpesh ishin më të besueshëm dhe rrethoheshin me simpati”.

Duke përfunduar znj. Topalli tha: “ E duke i pasur tanët shpesh edhe i kemi harruar, i kemi kaluar anash pa i përshëndetur, i kemi bishtnuar pa i dhënë dorën. Ne jemi borxhlinjtë. Lavdia e tyre nuk ka nevojë për asgjë. E jona ka nevojë për të.”

Motivacioni i nderimit për z. Aurel Plasari është si më poshtë:

Studjues, shkrimtar, përkthyes. Lindi në Tiranë ku kreu dhe studimet universitare për gjuhë e letërsi në Fakultetin e Historisë dhe të Filologjisë të UT. Më pas vijoi punën si pedagog i estetikës në UT më 1993. Lektor në INALCO, Paris. Prej vitit 1998 është drejtor i Bibliotekës Kombëtare në Tiranë. Autoritet në fushën e studimeve letrare dhe historike ka botuar: “Kuteli mes të gjallëve dhe të vdekurve”, “Letërsia dhe muret”, “Don Kishoti zbret në Shqipëri” (1990), “Vija e Teodosit rishfaqet” (1993), “Fenomeni Voskopojë” (2000), “Rrëmbimi i Europës” (2005), “Skënderbeu një histori politike” (2010). Është autor i disa romaneve dhe përkthyes nga letërsia botërore i autorëve të njohur si F. Dostojevski, G. Lorka, A. Ahmatova, G. Marquez, O. Fallaci.

Ndërmjet personaliteteve të tjera të letrave dhe të filologjisëtë nderuara në këtë veprimtari janë: Ismail Kadare, Gjergj Fishta, Eqerem Çabej, Faik Konica, Lasgush Poradeci, Ali Podrimja, Ibrahim Kodra, Marubi, Dritëro Agolli, Çesk Zadeja, Jusuf Vrioni, Martin Camaj, Vangjush Mio, Mitrush Kuteli, Prenkë Jakova, Sabri Hamiti, Reshat Arbana, Fatos Arapi, Frederik Shiroka, Selman Riza, Aleksandër Prosi etj.