Ngjarje

Konferencë për Gjon Buzukun e albanologes Lucia Nadin

 

Në Bibliotekën Kombëtare më 23 nëntor 2012 albanologia e njohur Lucia Nadin mbajti konferencën me titull “Meshari” i Gjon Buzukut – perspektivë e re kërkim. Merrnin pjesë z. Aldo Bumçi, ministër i Turizmit, Kulturës, Rinisë dhe Sporteve, përfaqësues të Institutit Italian të Kulturës në Tiranë, studiues të disiplinave albanologjike, personalitete të kulturës, shkrimtarë, gazetarë etj.

Duke përshëndetur pjesëmarrësit dhe veçanërisht znj. Lucia Nadin, drejtori i Bibliotekës Kombëtare z. Aurel Plasari tha: “Kam kënaqësinë të hap këtë konferencë të veçantë kushtuar Mesharit të Gjon Buzukut në ditët kur ky monument i gjuhës shqipe ndodhet në Shqipëri i ekspozuar për vizitorët në mjediset e institucionit tonë”. Mes të tjerash ai kujtoi se midis personaliteteve të ftuara në festimet e 100-vjetorit të shpalljes së Pavarësisë dallohet figura e albanologes së madhe Lucia Nadin, e cila një pjesë të jetës dhe veprës së saj ia ka kushtuar historisë së popullit tonë dhe kulturës sonë duke nisur qysh me zbulimin dhe kujdesin për botim të Statuteve të Shkodrës. “Lidhjet e saj me Bibliotekën Kombëtare,- vijoi z. Plasari,- janë gati 20-vjeçare duke filluar me veprimtarinë për Shqipërinë në hartat venedikase, për të vijuar me veprimtari të tjera si ajo me titull 5 shekuj marrëdhënie Arbëri – Venedik, me konferencën e dy viteve të kaluara kushtuar shtatores së Skënderbeut në Bucintoro-n e Venedikut etj.

Z. Aldo Bumçi duke i uruar mirëseardhjen mikes nga Italia dhe tha, mes të tjerash: “Nuk kemi fjalë për ta falënderuar atë për punën e mrekullueshme të saj për historinë e Shqipërisë dhe konkretisht për lidhjet me Venedikun. Shpresohet që kjo konferencë,- vijoi ai,- si edhe ajo që do të mbahet nesër në Muzeun Historik Kombëtar, do të sjellin kontribute me vlerë në këtë fushë”. Z. Bumçi nënvizoi se edhe libri i ri që sapo ka dalë në qarkullim, Shqipëria e rigjetur, dëshmon lidhjen shpirtërore të znj. Lucia Nadin me vendin tonë, çfarë na bën “të përkulemi me nderim para saj”. Ministri përgëzoi edhe z. Plasari për lidhjen e ngushtë të institucionit që ai drejton me albanologen e shquar.

Para se të fillonte konferencën e saj, znj. Nadin falenderoi z. Aldo Bumçi për ftesën. Një falënderim të veçantë ajo i drejtoi z. Aurel Plasari si ideator i kësaj konference.

Albanologia theksoi se interesimi për Buzukun ka nisur duke studiuar veprën tipografike të Benardino de Vitalit, botues i Marin Barletit. Po ashtu ajo vuri në dukje se është thelluar në studimin e aparatit figurativ të “Mesharit”, megjithëse ai nuk është mjaft i pasur për shkak se botimi tij është “ekonomik”, sikurse e cilësoi ajo.

Duke ecur në rrugën e studiuesve si J. Rrota, M. Roques, E Çabej etj., të cilët mendonin se për shtypjen e “Mesharit” duhej gjurmuar në tipografitë veneciane të kohës, znj. Nadin u dha përgjigje pyetjeve të tilla si kush ishte Gjon Buzuku dhe pse libri i tij u shtyp në Venecia. “Besoj se ai ka jetuar në Venedik si pjesë e komunitetit shqiptar të atjeshëm”,- pohoi studiuesja. Ajo argumentoi se Buzuku ishte françeskan dhe se duhet të kishte shërbyer në kishën e shenjtëve Giobbe dhe Bernardino, një ndër tri zonat françeskane të Venedikut, e cila ndodhej larg qytetit, pra edhe shtypshkronjës, çfarë përputhet me atë që pohon autori i “Mesharit” në Pasthënien e librit të vet.

Për këto përfundime me vlerë për Buzukun dhe veprën e tij, studiuesi Xhevat Lloshi, duke marrë fjalën në përfundim të Konferencës, vlerësoi lart kërkimet dhe gjetjet e albanologes Nadin, të cilat u japin përgjigje disa pikëpyetjeve të deritashme në studimet buzukiane.

Z. Plasari i dhuroi studiueses dhe mikes së Bibliotekës Kombëtare medaljonin e 90-vjetorit të institucionit të shoqëruar me një buqetë lulesh të freskëta. Të pranishmit patën mundësinë të njihen gjithashtu me botime të Lucia Nadinit që ishin ekspozuar posaçërisht për këtë rast.