Ngjarje

Promovohet në Tiranë riprodhimi i gazetës “Perlindja e Shqipëniës”

 

Pas promovimit në Prishtinë, riprodhimi jubilar fotostatik i koleksionit të gazetës “Perlindja e Shqipëniës”, organ i Qeverisë së Vlorës, u promovua më 27 dhjetor 2012 në Tiranë. Në ceremoninë e organizuar në mjediset e Bibliotekës Kombëtare të Shqipërisë merrnin pjesë politikanë, personalitetet të shkencës dhe kulturës, përfaqësues të shtypit etj.

Duke prezantuar botimin drejtori i Bibliotekës Kombëtare të Shqipërisë Prof. dr. Aurel Plasari, fillimisht nënvizoi se kjo ceremoni shënonte mbylljen e veprimtarive të vitit jubilar të shpalljes së Pavarësisë. Riprodhimi fotostatik si edhe digjitimi i koleksionit të kësaj gazete ishte ndër projektet e miratuara nga Komisioni Ndërqeveritar i Festimeve për 100-vjetorin e Pavarësisë. Z. Plasari tha se ky projekt i përbashkët pati një specifikë të veçantë: koleksioni i gazetës ishte pronë e BKSh-së, ndërsa riprodhimi fotostatik dhe digjitimi i tij u realizua nga BKUK; gjithashtu ai u konceptua edhe për pasurimin e koleksioneve të bibliotekave në Shqipëri dhe Kosovë, si edhe të për t’u hedhur në portalin albanologjik Shqipëri-Kosovë në ndihmë të përdoruesve në të katër anët e globit.

Drejtori i Bibliotekës Kombëtare dhe Universitare të Kosovës (BKUK) Prof. dr. Sali Bashota tha mes të tjerash se kishte kënaqësi të fliste për punën e përbashkët me BKSh dhe mikun dhe kolegun Aurel Plasari jo vetëm në këtë projekt, por edhe për bashkëpunimin e kahershëm institucional në të mirë të zhvillimit të bibliotekave në të dy vendet. Z. Bashota u ndal në veprimtarinë e gazetës “Perlindja e Shqipëniës” duke evidentuar rolin dhe misionin e saj sidomos në trajtimin e dukurive dhe problemeve të asaj periudhe fill pas shpalljes së Pavarësisë, si forcimi i shtetit shqiptar, çështjet e Kosovës dhe të Çamërisë, marrëdhëniet me vendet e fqinje dhe Europën etj. Ai vuri në dukje se, duke qenë zëdhënëse e ideve për mbrojtjen e interesave kombëtare, “Perlindja e Shqipëniës” ndikoi në ndërgjegjësimin e opinionit vendës dhe atij të huaj fatet e Shqipërisë pas shpalljes së saj shtet i pavarur.

Në këtë veprimtari mori pjesë edhe z. Aldo Bumçi, ministër i Turizmit, Kulturës, Rinisë dhe Sporteve. Në fjalën përshëndetëse ai u ndal në simbolikën e riprodhimit të gazetës së parë të qeverisë shqiptare dhe përgëzoi drejtuesit e të dy institucioneve për bashkëpunimin e shkëlqyer si model në marrëdhëniet Shqipëri – Kosovë. Pasurimi i portalit albanologjik edhe me variantin elektronik të kësaj gazete, theksoi z. Bumçi, u vjen në ndihmë studiueve dhe lexuesve brenda Shqipërisë dhe Kosovës, por edhe kudo që ata ndodhen në botë.

Të ftuarit panë me interes numra të ndryshëm të koleksionit të gazetës “Perlindja e Shqipëniës” të ekspozuar me këtë rast një ndër mjediset e Bibliotekës Kombëtare të Shqipërisë.