Ngjarje

Ngrihet Qendra e Digjitimit e Bibliotekës Kombëtare

 


Më 21 shkurt 2013 në ndërtesën e vjetër të Bibliotekës Kombëtare u përurua Qendra e Digjitimit, si një projekt i përbashkët i këtij institucioni me agjencinë turke të teknologjisë së informacionit TIKA.

Z. Aurel Plasari, drejtor i Bibliotekës Kombëtare, tha në fjalën e rastit se ngritja e kësaj qendre, si një risi që vjen për herë të parë në Shqipëri, lidhet me prirjet më bashkëkohore të bibliotekave sot në botë. Kemi patur një bërthamë,- kujtoi ai,- ndërsa tani po ngremë një qendër të vërtetë të digjitimit të vlerave tona të rralla bibliotekare, e cila do të realizojë variante të digjituara të trashëgimisë së shkruar kombëtare, dorëshkrime të koleksioneve orientale etj. “Përmes përpunimit të këtyre materialeve në këtë Qendër,- shpjegoi z. Plasari,- do të mundësohet jo vetëm shfrytëzimi në sistemin online përtej mureve të bibliotekës, por do të sigurohet edhe ruajtja nga humbja apo rrezikimi i origjinaleve të tyre që përmbajnë vlera të rralla si dorëshkrime, harta, koleksione antikuare që datojnë qysh nga shek. XV”.

Z. Aldo Bumçi, ministër i Turizmit, Kulturës, Rinisë dhe Sporteve, vuri në dukje se me ngritjen e kësaj qendre konkretizohet një nga objektivat më të rëndësishëm në fushën e librit. “Digjitimi i vlerave të rralla librore,- theksoi ai,- do të pasurojë më tej edhe Portalin Albanologjik Shqipëri – Kosovë duke rritur në mënyrë të ndjeshme burimet për studiuesit vendas dhe të huaj të disiplinave të ndryshme albanologjike”.

I pranishëm në ceremoni, ambasadori i Republikës së Turqisë në Tiranë z. Hasan Sevilir Aşan shprehu kënaqësinë që marrëdhëniet vëllazërore me Shqipërinë konkretizohen edhe në këtë mjedis ku po ngrihet Qendra e Digjitimit për vlerat e rralla bibliotekare. Ai theksoi se TIKA ka kontribuar me projekte të ngjashme edhe në fusha të tjera në Shqipëri dhe se shpresonte që, bashkë me z. Bumçi, të realizojnë projekte të tjera në të ardhmen.