Ngjarje

Java e Bibliotekës në Kosovë



U organizua në Republikën e Kosovës një veprimtari që tashmë ka krijuar traditë: Java e Bibliotekës. Veprimtaria u hap në mjediset e Bibliotekës Kombëtare dhe Universitare të Kosovës (BKUK) më 15 prill 2013. Mori pjesë në të edhe një delegacion i Bibliotekës Kombëtare të Shqipërisë (BKSh) i kryesuar nga drejtori i saj z. Aurel Plasari.

Ceremonia në Amfiteatrin e Madh filloi me mbajtjen e një minutë heshtjeje për vdekjen e ish-drejtorit të BKUK Bedri Hysa, njëherësh edhe personalitet i letërsisë dhe kulturës në Kosovë.

Fjalën e rastit në këtë hapje solemne e mbajti z. Sali Bashota, drejtor i BKUK, i cili përshëndeti autoritetet dhe pjesëmarrësit në këtë edicion të 11 të Javës së Bibliotekës. Pastaj përshendetën z. Memli Krasniqi, ministër i Kulturës, Rinisë dhe Sporteve; znj. Jennifer Walasheski, përrfaqësuese e Ambasadës së ShBA në Prishtinë; dhe z. Ibrahim Gashi, rektor i Universitetit të Prishtinës “Hasan Prishtina”.

Moment historik shënoi nënshkrimi i marrëveshjes së mirëkuptimit për ndarjen e BKUK në Bibliotekën Kombëtare të Kosovës dhe Bibliotekën Qendrore Universitare të Universitetit të Prishtinës. Me këtë rast z. Ramë Buja, ministër i Arsimit, Shkencës dhe Teknologjisë, theksoi faktin që kjo ndarje do të kontribuojë për një efektshmëri më të shtuar të këtyre dy bibliotekave.

Pas një koncerti instrumental të Trio Celebre, të pranishmit vizituan ekspozitën Design Jam organizuar në Sallonin e Ekspozitave të BKUK me punime të studentëve të Fakultetit të Arteve të Universitetit të Prishtinës.

Pasdite veprimtaria vijoi me ligjëratën Zëri i Bibliotekës suaj përmes programeve, mbajtur nga znj. Elizabeth Cromwell, e bibliotekës publike të Qarkut Fredrick, Maryland, në ShBA dhe ligjëratën Udhëpërshkruesit në Kosovë, mbajtur nga z. John Hodgson, studiues dhe përkthyes i letërsisë shqipe nga Britania e Madhe.

Të nesërmen veprimtaria vijoi me mbajtje ligjëratash. Prof. dr. Aurel Plasari referoi punimin Shqipëria e udhëtarëve frëngë në Orient, në të cilin ai solli kontributin e tyre në dhënien e një informacioni të plotë për Shqipërinë dhe shqiptarët duke hapur kështu rrugën për krijimin dhe konsolidimin e shkencës albanologjike dhe të disiplinave të saj. Z. Plasari iu referua në këtë punim koleksioneve të veprave të udhëtarëve francezë nëpër Shqipëri të identifikuara prej tij kryesisht në BKSh, por edhe në Bibliotekën Kombëtare të Francës dhe biblioteka të tjera. Ligjërata ngjalli kureshtjen shkencore të të pranishmëve, çfarë u manifestua në pyetjet e tyre interesante dhe në përgjigjet e ligjëruesit.

Prof. asoc. dr. Ibrahim Gashi, rektor i Universitetit të Prishtinës, mbajti ligjëratën Biblioteka Universitare në shërbim të studentëve të Universitetit të Prishtinës. Fillimisht ai u ndal në kontributin e universitetit në përgatitjen e specialistëve në degë dhe disiplina të ndryshme të dijes, si dhe në problemet që përballohen dhe zgjidhen në fushën e mësimdhënies dhe atë të kërkimit shkencor. Referuesi nënvizoi mbështetjen që do të ketë Universiteti i Prishtinës nga veprimtaria e bibliotekës së re. Trupa akademike dhe studentët do të sigurojnë këtej e tutje një shërbim më bibliotekar të specializuar dhe më efektiv.

Me referuese znj. Elizabeth Cromwell u zhvillua në Amfiteatrin e Vogël debati me temë Biblioteka përtej kufijve të saj, në të cilin morën pjesë anëtarë të PEN Qendrës dhe punonjës të bibliotekave të Kosovës.

Moment të rëndësishëm shënoi nënshkrimi nga titullarët e BKSh dhe BKUK i aktit të marrëveshjes për implementimin në Republikën e Kosovës të programit të Shkollës Kombëtare të Bibliotekave pranë BKSh me punonjës të BKUK, të Bibliotekës së re Universitare, bibliotekave komunale etj. Kjo shënon një shkallë të re të bashkëpunimit të hershëm midis këtyre dy bibliotekave si dhe një hap më tej në integrimin e sistemeve kombëtare të bibliotekave të të dy vendeve. Për të pranishmit u prezantua edhe programi i përshtatur i kësaj Shkolle në zbatim të marrëveshjes së nënshkruar.

Si pjesë e pandashme e veprimtarive në kuadër të Javës së Bibliotekave u zhvillua edhe në këtë edicion Dita e Donacioneve: dhurimi nga familjarët i bibliotekës së shkrimtarit Hasan Mekuli, dhurimi nga z. John Hodgson i një numri të konsiderueshëm librash me karakter albanologjik, dhurimi nga studiuesi Bejtulla Destani i një koleksioni me fotodokumente nga Londra etj.

Edicioni i 11-të i Javës së Bibliotekës do të vijojë me veprimtari në bibliotekat e Junikut, Hanit të Elezit, Prizrenit dhe të Dragashit për t’u mbyllur më 20 prill.