Ngjarje

100 vjet “Hylli i Dritës”: ekspozitë retrospektive

 

Biblioteka Kombëtare e shenjoi 100-vjetorin e revistës “Hylli i Dritës"me hapjen më 1 dhjetor të një ekspozite retrospektive me koleksionin e këtij organi që ajo ruan në fondet e veta. Në ceremoni morën pjesë z. Zef Çuni, zëvendësministër i Kulturës, z. Ardian Ndreca, kryeredaktor i edicionit aktual të "Hyllit të Dritës", personalitete të kulturës dhe të gazetarisë, punonjës të bibliotekave etj.

Në fjalën e rastit z. Aurel Plasari, drejtor i Bibliotekës Kombëtare dhe njëherësh ish-kryeredaktor i edicionit 1993-1997 të “Hyllit të Dritës”, njoftoi përfundimin e digjitimit profesional të koleksionit historik të kësaj reviste (1913-1944) të shquar në fushën e albanologjisë, por edhe të historisë së letrave shqipe, ndërkohë që po punohet për hedhjen e tij online brenda këtij muaji, në mënyrë që ai të shfrytëzohet gjerësisht nga studiues dhe lexues kudo qofshin ata brenda dhe jashtë vendit. “Koleksionet e revistës janë ekspozuar të hapura dhe vizitorët do të kenë mundësi të ndeshen në faqet e saj jo vetëm me emra të shquar të urdhrit françeskan si Gjergj Fishta, themelues i saj, por edhe me emra të tjerë të spikatur jashtë këtij urdhri ose edhe albanologësh të huaj”,- theksoi z. Plasari. Një gërshetim i tillë emrash, siç i kujtoi ai, jep një ide të qartë se ç’ishte “Hylli i Dritës”.

Duke përshëndetur në emër të Ministrisë së Kulturës z. Zef Çuni falënderoi drejtuesit e Bibliotekës Kombëtare për veprimtarinë përkujtimore, gjithashtu edhe drejtuesit e sotëm të këtij organi të shquar.

Për të ftuarit u shpërndanë disa kopje të koleksionit të kësaj reviste të hedhura në DVD.

Të pranishmit kaluan me interes në eksponatet ku shpërfaqen numra të ndryshëm të revistës të viteve 1913-1944.