Ngjarje

Akordohet Çmimi i Bibliofilisë “Lumo Skendo”

 

Më 13 dhjetor u shpall fituesi për vitin 1912 i Çmimit Kombëtar të Bibliofilisë “Lumo Skendo”, i cili për çdo vit i akordohet nga Ministria e Kulturës botimit më të spikatur për vlerat estetike dhe tipografike. Ceremonia e dhënies së çmimit u organizua në sallën “Lumo Skendo” në mjediset e ndërtesës së vjetër të Bibliotekës Kombëtare.

Z. Aurel Plasari, drejtor i Bibliotekës Kombëtare dhe kryetar i jurisë, në të cilën bënin pjesë personalitete nga fusha e kulturës, shkencës dhe botimeve, vuri në dukje se kjo ceremoni simbolikisht organizohet në sallën që mban emrin e themeluesit të Bibliofilisë shqiptare. Ai theksoi që shtëpitë botuese vijojnë të japin produkte me cilësi të lartë edhe në pikëpamje bibliofilike. Mes botimeve me nivel të lartë të përzgjedhura për fazën finale të konkurrimit si albumi “100 Vjet Pavarësi Kombëtare” (Aleksandër Meksi) nga shtëpia botuese “Eugen”, “Rrethimi i Shkodrës” (Marin Barleti) nga shtëpia botuese “Onufri”, albumi fotografik i Leon Çikës etj., u shpall fitues botimi “Lekë Matranga, njeriu, koha, vepra”, i autorit Matteo Mandala, realizuar nga shtëpia botuese Ombra GVG. Z. Plasari u uroi botuesve botime të tilla ku vlerat bibliofilike të vijnë duke u shtuar”.

E pranishme në ceremoni, e mori fjalën znj. Mirela Kumbaro, Ministre e Kulturës. Ajo theksoi se ky çmim ka domethënien e vet për mbështetjen e librit si produkt cilësor edhe në aspektin e kulturës së botimit. “Çmimi bibliofilik,- tha ajo,- tregon preokupimin e botuesve për të realizuar botime luksoze si fituesi që u shpall sot. Jemi vërtet vend i varfër dhe prandaj luksi i librit është diçka e re për ne”. Pasi përgëzoi shtëpinë botuese fituese, znj. Kumbaro tha se duke filluar nga viti i ardhshëm organizimi dhe shpallja e këtij çmimi do të jetë ekskluzivitet jo i Ministrisë së Kulturës, por i Bibliotekës Kombëtare, e cila i ka të gjitha kapacitete e duhura për mbarëvajtjen e tij.

Z. Gëzim Tafa, drejtor i shtëpisë botuese Ombra GVG, falënderoi Jurinë si dhe znj. Mirela Kumbaro dhe kryetarin e Jurisë z. Aurel Plasari për konsideratat e shprehura për botimin me të cilin ai fitoi këtë çmim prestigjioz.