Ngjarje

VIZITË LAMTUMIRE E AMBASADORIT ARVIZU NË BIBLIOTEKËN KOMBËTARE

 

Para largimit nga Shqipëria z. Alexander Arvizu, ambasador i Shteteve të Bashkuara të Amerikës në Tiranë, bëri një vizitë lamtumire në Bibliotekën Kombëtare. Drejtori i Bibliotekës Kombëtare z. Aurel Plasari mirëpriti në zyrën e tij Ambasadorin e Shteteve të Bashkuara të Amerikës në Tiranë z. Arvizu, i cili shoqërohej nga shefja e Zyrës së Marrëdhënieve me Publikun Znj. Valerie O’Brien.

Z. Plasari mbasi e falënderoi Ambasadorin për vëmendjen dhe mbështetjen e vijueshme që Ambasada Amerikane jep për Këndin Amerikan në Tiranë, vlerësoi ecurinë e suksesshme të bashkëpunimit të ngushtë me Ambasadën Amerikane në Tiranë, madje duke e veçuar ndër partnerë e tjerë si më të çmuarin dhe më bashkëpunuesin.

Duke nënvizuar kërkesën në rritje të brezit të ri për të përdorur gjithnjë e më shumë, si materialet tradicionale të informacionit, ashtu edhe teknologjitë e informacionit dhe komunikimit, - çka Këndi Amerikan ofron, - Plasari bëri me dije Ambasadorin për risitë e sjella nga Biblioteka Kombëtare këtë fillimvit : tanimë Këndi Amerikan është në shërbim të publikut nga e hëna në të premte 08.00-20.00 dhe ditë të shtunë e ditë festash zyrtare nga ora 08.00-14.00. Plasari premtoi që së shpejti specialistët e Sektorit të Informatikës e Teknologjive të Reja do të mundësojnë në faqen e Bibliotekës Kombëtare edhe një lidhje të veçantë për Këndin Amerikan, ku mund të promovohen veprimtaritë e larmishme që organizohen për grupmosha dhe kategori të ndryshme sociale.

Ambasadori Arvizu përgëzoi bashkëpunimin e shkëlqyer që ekziston midis Ambasadës dhe Bibliotekës Kombëtare, si dhe lavdëroi Këndin për programet dhe aktivitetet e shumta. Z. Arvizu i dhuroi z. Plasari botimin “America's Art”. Z. Plasari i dhuroi ambasadorit botimin e fundit të Bibliotekës Kombëtare “Arbëria në hartat e vjetra të Bibliotekës Kombëtare” (XVI-XVIII).

Me urimin që fryma e bashkëpunimit të frytshëm, nisur prej vitit 2003, të thellohet edhe më shumë në të ardhmen, Plasari i shprehu Ambasadorin Arvizu gadishmërinë për të thelluar bashkëpunimin si partnerë.