Ngjarje

80-vjetori i Prof. as. dr. Shefqet Hoxha, “Mësues i Popullit”

 

Biblioteka Kombëtare dhe shoqata “Luma” organizuan më 4 prill të këtij viti një tubim në nder të 80-vjetorit të Prof. as. dr. Shefqet Hoxha, “Mësues i Popullit”, në të cilën morën pjesë akademikë, studiues, publicistë etj.

Prof. dr. Aurel Plasari, drejtor i Bibliotekës Kombëtare, tha në fjalën e tij se e kishte pritur me kënaqësi propozimin e shoqatës “Luma” për festimin e 80-vjetorit të studiuesit Shefqet Hoxha. Ai theksoi se vepra gjysmëshekullore e Shefqet Hoxhës ruhet dhe shërbehet në koleksionet e Bibliotekës Kombëtare si edhe faktin që ky studiues, mik i Bibliotekës Kombëtare, është një ndër përdoruesit më të rregullt të koleksioneve albanologjike të saj. Mbi të gjitha z. Plasari veçoi kontributin e Shefqet Hoxhës në fushën e studimeve që lidhen me etnokulturën si dhe i uroi studiuesit vite të shëndetshme pune dhe vepra të reja.

Kryetari i shoqatës “Luma”, shkrimtari dhe studiuesi Izet Duraku foli për kontributin e studiuesit Shefqet Hoxha. Ai u ndal sidomos në veprimtarinë shkencore të tij, e cila paraqitet në mbi 40 vepra të botuara, duke nënvizuar edhe faktin se prof. as. dr. Shefqet Hoxha ndër vite ka qenë bashkëpunëtor i jashtëm i disa instituteve të Akademisë së Shkencave. Z. Duraku veçoi edhe ai studimet etnologjike të Shefqet Hoxhës dhe i uroi studiuesit jetë të gjatë për të vijuar projektin e tij të korpusit të etnokulturës.

Z. Shefqet Hoxha falënderoi organizatorët e ceremonisë dhe pjesëmarrësit në të. Ai i dhuroi Bibliotekës Kombëtare disa prej botimeve më të fundit të tij. Gjithashtu z. Aurel Plasari, i dhuroi studiuesit njërin prej botimeve më të shquara të institucionit që ai drejton: Bibliografinë retrospektive të librit shqip (1555-1944), në dy vëllime.

Me këtë rast në mjediset e Bibliotekës Kombëtare ishte organizuar një ekspozitë me botime të autorit Shefqet Hoxha nga fushat e dialektologjisë dhe leksikologjisë, folkloristikës, etnologjisë, historisë etj.