Ngjarje

Shtypi shqiptar në Mal të Zi

 

Më 8 prill 2014 Biblioteka Kombëtare e Shqipërisë dhe Akademia Shqiptare e Arteve dhe e Shkencave, në bashkëpunim me Bashkimin e Krijuesve Shqiptarë në Malin e Zi, organizuan një veprimtari kushtuar revistave dhe botimeve kulturore-shkencore të shqiptarëve Republikën e Malit të Zi. Për të ruajtur traditat në fushën e gjuhës dhe kulturës shqiptarët e Malit të Zi nxjerrin një numër revistash letrare dhe kulturore, në të cilat japin kontribut krijues shqiptarë që jetojnë atje, por edhe ata në Kosovë, Shqipëri dhe diasporë.

Duke u uruar mirëseardhjen drejtuesve dhe përfaqësuesve të revistave shqiptare në Mal të Zi, Prof. dr. Aurel Plasari, drejtor i Bibliotekës Kombëtare, theksoi se kjo veprimtari e përbashkët organizohet për të promovuar këto botime të bashkëkombësve tanë në Mal të Zi dhe pasurimin e plotë dhe të rregullt me to të koleksioneve të Bibliotekës qendrore të të gjithë shqiptarëve kudo që ata jetojnë. “Le ta konsiderojmë këtë takim,- tha z. Plasari,- si një tubim të përbashkët për njohje dhe shkëmbim idesh me njëri-tjetrin, si edhe për një bashkëpunim më intensiv në të ardhmen”.

Prof. dr. Marenglen Spiro, kryetar i Akademisë Shqiptare të Arteve dhe të Shkencave, pasi përshëndeti të pranishmit, vlerësoi sidomos faktin që kjo veprimtari promovuese zhvillohet në bashkëpunim me Bibliotekën Kombëtare të Shqipërisë, të cilën e cilësoi tempull të kulturës dhe dijes mbarëshqiptare. Ai mbështeti idenë për rritjen e bashkëpunimit në të ardhmen të këtyre dy institucioneve.

Veorimtarin\ e përshëndeti edhe Prof. dr. Emil Lafe, i cili vlerësoi revistat kulturore-shkencore të shqiptarëve në Mal të Zi si një kontribut të rëndësishëm në kulturën tonë kombëtare. Ai e konsideroi veprimtarinë e këtyre revistave si një shprehje të mbijetesës nëpërmjet ruajtjes së gjuhës dhe identitetit kombëtar.

Në takim e morën fjalën Simë Dobreci (revista "Buzuku), Nail Draga (Qendra kulturore Ulqin, revista "Lemba"), Ardita Rama (Biblioteka Ulqin), Ali Salaj (Art Club - Ulqin, gazeta "Koha javore"), Gazmed Çitaku (revista "Dija") etj. si dhe studiues vendas të pranishëm në tubim, si Pëllumb Xhufi, Moikom Zeqo, Pandeli Çina, Gjokë Dabaj etj.

Me këtë rast ishte çelur edhe një ekspozitë me libra dhe botime të tjera të autorëve shqiptarë që jetojnë në Malin e Zi ose e kanë origjinën nga ato vise.