Ngjarje

Java e bibliotekës në Kosovë

 

Drejtues dhe specialistë të Bibliotekës Kombëtare të Shqipërisë (BKSh) morën pjesë në veprimtaritë e organizuara nga Biblioteka Kombëtare e Kosovës “Pjetër Bogdani” (BKK) në kuadër të Javës së bibliotekës (edicioni i 12-të).

Hapja solemne e veprimtarive u shënua më 14 prill 2014 në Amfiteatrin e Madh të kësaj Biblioteke. Ushtruesja e detyrës së drejtorit të BKK, znj. Ramize Bajraktari, pasi përshëndeti të pranishmit në këtë ceremoni, tha se Java e Bibiotekës në Kosovë është shndërruar tashmë në një manifestim tradicional shumë të rëndësishme për jetën kulturore dhe zhvillimin e bibliotekave në vend. Edhe në këtë edicion,- theksoi ajo,- veprimtaritë do të përfshijnë ligjërata, donacione, promovime dhe ekspozita botimesh, deri edhe hapje të dy bibliotekave shkollore në Pejë dhe në Vushtri.

Duke përshëndetur në këtë ceremoni z. Memli Krasniqi, ministër i Kulturës, Rinisë dhe Sportit i Kosovës, tha se Java e bibliotekës është një veprimtari që mbledh shumë njerëz në mjediset e kësaj biblioteke, pra një rast për ta afruar më shumë lexuesin. Ai vuri në dukje që, pavarësisht se teknologjia e sotme po e sfidon librin, asgjë nuk mund të zëvendësojë ndjesinë dhe aromën e fletëve të librit të shtypur, i cili vijon të mbetet i veçantë. Z. Krasniqi theksoi se bibliotekat kombëtare janë pa dyshim një nga pasuritë më të mëdha që ka një shtet dhe se e tillë duhet të jetë edhe BKK si një institucion ndër më përfaqësuesit e Republikës së Kosovës jo vetëm për nga pamja, por edhe për nga puna që kryen, për nga shërbimet që ajo ofron për lexuesit.

Të pranishmit i përshëndeti edhe z. Aurel Plasari, drejtori i BKSh, i cili tha se marrëdhëniet institucionale midis bibliotekave kombëtare përkatëse janë ndër më të hershmet në kuadër të marrëdhënieve midis dy vendeve. Ai përmendi si kulmin e ecurisë së këtyre marrëdhënieve themelimin përbashkët të Konferencës Kombëtare të Bibliotekonomisë Shqipëri-Kosovë, e cila sivjet mban edicionin e saj të 9-të. Bashkëpunimi me Bibliotekën Kombëtare të Kosovës,- nënvizoi z. Plasari,- zë vendin kryesor në planet dhe programet tona të punës.

Pas Hapjes solemne të pranishmit vizituan ekspozitën “200 vjet të Jeronim De Radës” me vepra të poetit arbëresh në fondet e BKK, ekspozitë që shoqërohej nga katalogu përkatës.

Pasdite veprimtaria vijoi me ligjërata lidhur me temën e Javës së bibliotekave, e cila u kushtohej koleksioneve bibliotekare dhe kujdesit për zhvillimin dhe menaxhimin e tyre. Ligjëruan Janet Crayne (Biblioteka e Universitetit të Miçiganit-ShBA) dhe Nehat Krasniqi (BKK).

Në këtë seancë Dr. Etleva Domi, zëvendësdrejtoreshë e BKSh, ligjëroi temën “Zhvillimi i koleksioneve në mediumin elektronik”. Në epokën e konkurrencës teknologjike,- tha ajo,- kur përditë flitet e shpresohet për integrime në rrjedhat europiane e botërore, dy bibliotekat kombëtare në Tiranë dhe Prishtinë synojnë dhe nxitin bashkëpunime dhe këndvështrime të reja për zhvillimin e koleksioneve digjitale. Ndryshimet marramendëse në biblioteka nuk lidhen vetëm me revolucionin teknologjik, por edhe me politikat/strategjitë/kriteret/vizionet, të cilat mbështeten në dy koncepte: “shumëllojshmërinë e informacionit”, ku përfshihet si formati i shtypur edhe ai elektronik , dhe “shkallën e qasjes”, që i referohet suportit teknologjik për të mundësuar qasjen elektronike.

Në ditën e dytë të veprimtarive kulmoi promovimi i albumit “Arbëria në hartat e vjetra të Bibliotekës Kombëtare (shekujt XVI-XVIII)”, në të cilin Prof. dr. Aurel Plasari, drejtor i BKSH, mbajti ligjëratën “Hartografimet e Arbërisë në shërbim të albanologjisë”.

Ligjëruesi tha se botimi në formë albumi i koleksionit të hartave të vjetra në të cilat paraqitet Arbëria, ose vise të saj, e këtyre shekujve shënon një nga arritjet e fundit të BKSh. Ai sqaroi se koleksionet e hartave të vjetra në BKSh vijojnë edhe pas shek. XVIII dhe gjithashtu se fakti që albumi fillon me harta të shek. XVI nuk do të thotë që Arbëria nuk është hartografuar edhe para këtij shekulli.

Duke përfunduar paraqitjen e këtij botimi, z. Plasari tha se “në krahasim me numrin tejmase të madh të burimeve ekzistuese hartografike me vlerë për arbërit dhe Arbërinë, hartat e këtij albumi përbëjnë ende vetëm një pjesë pasurie. Pjesa tjetër, e shpërndarë në dhjetëra biblioteka të tjera nëpër Europë dhe në botën mbarë, mbetet për t’u qëmtuar e përmbledhur, posaçërisht tanimë në epokën e mundësive të pafundme të ofruara prej Teknologjive të Reja si një desideratum në shërbim të mëtejshëm të albanologjisë dhe historisë së saj”.

Një numër ekzemplarësh të Albumit iu dhuruan Bibliotekës Kombëtare të Kosovës për koleksionet e saj dhe të bibliotekave të tjera të interesuara. Duke përfituar nga rasti z. Plasari deklaroi se në të ardhmen krejt të afërt do të vijojë tradita e botimeve të përbashkëta e të dy bibliotekave si ajo e ribotimit vitin e kaluar të gazetës së Qeverisë së Vlorës “Perlindja e Shqipëniës” me rastin e 100-vjetorit të Pavarësisë.

Në këtë ditë vijuan edhe ligjëratat siç ishte ajo e Carl Bean (ShBA) për menaxhimin e koleksioneve të bibliotekave komunale apo ato të Lavdije Rrahmanit, Bukurije Halitit, Jehona Shalës dhe Izet Abdylit. Gjithashtu u çel ekspozita “Kosova në harta” (nga koleksioni i hartave në fondin e BKK). Pasditja ishte rezervuar për promovimin e veprës së përkthyer në frëngjisht të poetit Ali Podrimja.

Ditët e tjera veprimtaritë vijuan në bibliotekat komunale në Vushtri dhe Pejë. Java e Bibiotekës në Kosovë u mbyll më 19 prill.